رواية حب في الجمس من أجمل الروايات السعودية

قصة حب في الجمس إحداثها حدثت في السعودية
+*+*+؟*(حب في الجمس)+*+*+*؟+*
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــ
اليوم الأربعاء نزلت نسايم وندى من الدرج ولقوا أخوهم فهد نازل وجلسوا
يسولفون وكانت الساعه11ونصف وسلموا على أمهم وكل واحد حب رأسها وبعد
ماجلسو إلام: وين نهى
نسايم:أكيد نايمه
ندى:أمس دخلت عليهاالساعه2 وكانت قاعدة عل كمبيوتر
فهد:انانفسي افهم ش تسوي
وقاطعهم دخول الوالد:السلام عليكم
الكل وعليكم السلام
ابوفهد:وين نهى؟
أم فهد:نايمه
ندى:إيه إيه اسأل عن بنتك وانأ خلني لي الله
ابوفهد:أنت تعرفين انتو مثل أصابعي لي غاب واحد فيكم افقده بس
القعدة فاكهه البيت
ندى: ما أقول لنا الله
فهد يسال ببلاهة: يبه أنا إي إصبع فيهم
أبو فهد: أنت وش ودك ؟ <<< يجاريه
فهد: والله إذا ممكن أخر واحد لان اعز هل إصبع مدري ليه مع إن
ماله فايده
أبو فهد: وجع هذا وأنت رجال تقول هل الحكي
نسايم: إلا يبه غريبة رجعتك بدري
أبو فهد: اشو انك ذكرتيني الله يذكرك بشهادة
أم فهد :خير إن شأ الله
أبو فهد:تودق بو عبد العزيز ويقول الجمعة عندهم اليوم
فهد: اجل خل ندق على شباب ونتواعد بمكان من زمان عنهم وطلع
نسايم: واااااااو وناسه اكييد كل بنات عمي بيجون
وش البس ياربي وش البس<<<تكلم نفسها
فقطع عليها تفكيرها ندى:أنا بلبس تيور اللي اشتريته من الإمارات يييييوه
انشأ الله يكون نظيف
أم فهد: تقوليين انشأ الله قومي شوفييه ترى أنا بعد المغرب بمشي
قامت ندى بتصعد الدرج ونادتها أمها: تكفين ندووي قومي هل الخيشه نهى
ندى:ابشري وراحت وصحت ندى اللي بالموت صحت وحمدت الله تيورها نظيف
وعرفت عن العزيمة طبعا بدو بتخطيطات<<<< مجرمييين
وبعد الغدى إلام والابو راحو يرتاحون وبنات راحو يكملون خططهم
وفهد اتفق ويا عيال عمه أنهم يجتمعون بيت ابوحمد ويمر عبد العزيزبالجمس ويأخذهم
الجد:الايا فهد مانويت تعرس.
فهد:تو الناس
الجد: إي تو الناس اللي كبرك عندهم عيال.
فهد: يصير خير تامر على شي أنا بروح اريييح
الجده : مايامر عليك عدو ببس وصلني بدربك
الجد: هو يأمره كان قلتي لي أوصلك بعيوني.
الجدة:عيونك خلها لك مابيها أنت شل روحك وانأ خلني على فهد
الجد: الحين ماعد نعجبك
فهد: صلوا ع النبي ياجماعه بياذن العصر وانتم تطاقون يلله ياجدتي قومي.
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
إما الوضع عند البنات غير نسايم وندى ونهى اتصالات واتفاقات ودنيا شغالة اللي تحط مناكير
والي تستشور وندى حاطه لفافات بشعرها وبفمها مصاصه وتكلم العنود بنت عمها بالجوال ودخلت
أمهم عليهم الساعه4 العصر
إلام: مابعد خلصتو
نسايم: ليش
نهى: ياغبيه عشان العزيمة.
إلام: عيب عليك تكلمين أختك كذا
نهى: ماقلت شي غلط
إلام: نهى اخلصي ترى مابقي شي عل مغرب
ندى: على كيفك يمه بقي ساعتين الاربع
ا لام: معليش خلصو.
راحت نهى عشان تلبس وما تحصل هوشه من أمها فتحت الدالوب طلت تنوره جينز سماويي
تحت ركبه بشوي وبلوزه زهري وليموني<<<ألوانها المفضلة
وتروشت ولبست وحطت لها
شدو ناعم بلون زهري يدرج الين يكون اصفر وكحل اسود مبين جمال عيونها اللي مثل
عيون جدتها وقلوس زهري وشعرها فالته ناعم اسود يوصل نص ظهرها
ونزلت وفي الدرج
ندى:وااااااو شو ها لحلاوة يشوفونك بيخطبونك قبلي روحي غسلي وجهك وانفشي كشتك
نهى:لا عيوني ماراح أسوي شويي موتي بغيرتك
فهد:اسرعو ورانا وراي ناس بوصلكم
نسايم: وهي نازله ممكن اعرف ليش أنت مطفوق
نهى: يللللللللله ياندى ترى تأخرنا ترى فهد بيذبحك
ندى:اصبري ماكله مصاص وماطاع يروح اللون من فمي
نهى:موشغلي انك بزر
ندى: لاحبيبتي محد بزر غيرك
وفي بداية الدرج نسايم:وجع يالمبزره بس أنتي وياها اللي يشوفكم منا يقول كل وحده كبر
جدتي
نهى:والله حبيبتي مالك شغل.... <<دخل فهد
فهد: وجع لو إنكم تفصلون العبايات ماطولتو هالكثر ترى مب موديكم3 دقايق والله لوماتجونه
بروح وطلع وصفق الباب وراه
طبعا البنات ارتبشو لأنه سوااهافيهم أكثر من مره.
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــ
*تعريف بالعوئل*
الجد: ابو عبد الرحمن(حمد)
الجده:ام عبد الرحمن(ساره)
الجد والجده عايشين بيت ولدهم عبد الله ترتيبه الثالث(ابو فهد) يمكن تسغربون بس الجده
ماتحب الا ام فهد وماترتاح الا لها مع ان كل زوجاتهم طيبين بس عجايز وحركاتهم.
~~~~~~~~~~~~~~~~~~~~~~~~~~~~~~~~~~~~~~~~
ابنائهم:
:عبد الرحمن ابو عبد العزيز:طبعا كبير عائله وله الشور بعد ابوه
تهاني ام عبد العزيز:ام فاضله
ساره:عمرها 26متزوجه ولد عمتها راشد وهي حاليا حامل
عبد العزيز:عمره23متخرج فسم بترول ومعادن وعو حاليا يشتغل بشركه العائله
رهف:21اخر سنه لغات وترجمه
مشعل:عمره 17 ثاني ثنوي
~~~~~~~~~~~~~~~~~~~~~~~~~~~~~~~~~~~~~~~~~
عبدالله ابو فهد:وشخص يتميز بحكمته وصبره شديد
فاطمه ام فهد: الام المحبه والمعطائه
فهد:25 سنه ويشتغل مع ابوه وعمامه
نسايم:21تدرس تربيه خاصه
ندى:19تدرس علم نفس
رامي: 18 بثالث ثنوي
نهى: القعده المدلعه 17 ثاني ثنوي
~~~~~~~~~~~~~~~~~~~~~~~~~~~~~~~~~~~~~~~
العمه لطيفه:ام نايف اللي ضحت بشبابها عشان تربي عيالها بعد موت ابوهم الله يرحمه
نايف:28وامنيه امه انه يتزوج بس عنده عقده من هسالفه بتنكشف مع احداث القصه
راشد:27 متزوج ساره بنت خالته وعنده احلام ومرته حامل مثل ما قلنا
نواف:25 ولد فله موسع صدر وداييم طقاق مع العنود اخته
العنود:21 دلوعه ماما
~~~~~~~~~~~~~~~~~~~~~~~~~~~~~~~~~~~~~~~~
سلطان:ابوحمد
نجاه:ام حمد
حمد:22متخرج قسم محاسبه وبيشتغل بعد الباجازه في شركه العائله
فهده:20سنه تدرس اداره اعمال
مروان:18سنه اول جامعه متقدم سنه
~~~~~~~~~~~~~~~~~~~~~~~~~~~~~~~~~~~~~~~~~
لعم سلمان:عمره 26 ويدرس بل خارج قانون وبقيله 6 شهور ويرجع وسط اهله
~~~~~~~~~~~~~~~~~~~~~~~~~~~~~~~~~~~~~~~~
وصلو ولقو الكل مجتمع وطبعا البنات سلمو وراحو بمجلس ثاني وكل شوي جايه وحده من
الحريم تعالو تقهوو معنا...
فهده: ياربيييه من هل حريم مايدرون ان قعدتهم ممله وتطفش كل شوي عازمينا مايدرون
اننا فتيات نبي نقعد بلحالنا
نهى:والله انك صادقه اجل لين قعدنا هذاك مات وهذاك لاحيا وهذيك جاها مدري وشو والله
ياعندهم حش موب صاحي
نسايم:اسكتي ترا بيجي يوم ونصيير حريم وبناتكم بيقولون عنك كذا
فهده+نهى: لا نشالله استغفر الله
وسكت الجميع لانه شغلو المسجل ويرقصون
فهده: نهووه تعالي ابيك بره
نهى: مابي
فهده باستغراب:لييش؟
نهى:لان وبصراحه اسمي مو نهوووه
فهده : اسفين بنت العم نهى تفضلي
نهى: اي كذا اطلع
وطلعو برى من دوون مايحسون البنات
فهده: شلونك
نهى: قطع الله ابليسك مطللعتني من الوناسه عشان كذا ... اقول خلني ارجع
فهده:لا هذي مقدمات يختي مو كل شي دفاشه
نهى: خلصتي من مقدماتك تفضلي
فهده وهي تدور بجيوبها : ويننه ياربيييه
نهى : وشو
فهده: الجوال انتضري بروح اجيبه
وراحت فهده ونهى قعدت حوالي عشر ثواني وهي تنتظر
بس سمعت صوت جاي من الباب الوراني حق الخد م
وحست انه رجال وبلفعل كان مشعل بيروح وقرب من جهتها
وهي كانت واقفه بزاويه يعني تقدر تحس بالخطواات
وراحت تركض ولقت عبدالعزيزطالع من البوابه الرئيسيه
خلاص ضاعت فيهاالدنيا وش تسوي كان الكراج مقابلها وكان جمس عمهاموجود
ور كبته وكانت تظن انه دقايق وبتطلع لكن المصيبه ان عبدالعزيزكان بيدخل المفتاح
يعني بيركب انصدمت وبحركه خفيفه طمرت ورااا بس المو ضوع مايخلى من رعب ودموع
وكانت تتحمد ان الجمس كان مفتوح ولا كان راحت فيها وجلست مطمنه راسها ودموعها
منهمره وتدعى ربها انه مايشوفها وتعدي هل ازمه على خيير
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــ
رجعت فهد ه ومالقت نهى فهده في نفسها: ماتترك حركاتها هالبايخه اوريها
ورجعت جوا مع الجو والربشه والوناسه غاب الموضوع عن بالها
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــ
مشى عبد العزيز بالسياره ونهى ورا كاتمه الخوف والضحكه على عبد العزيز اللي مصدق ان
مامعه احدوماخذ الراحه ويغني ويحاكي نفسه
والخوف كيف بترجع للبيت ؟؟؟؟؟؟؟؟
وصل عند بيت عمه سلطان ابو حمد لا نهم متفقين اذا خلص عبد العزيز اغراض امه يمرهم
عشان تكفيهم السياره طبعا اللي ركب قدام اهو فهد ولا عنده فيهم
اما الباقين جلسو يطاقون من يركب ورا
وحمد اللي ماسك جواله ومشتغل فيه طفش وركب ورا اما نهى وما ادراك ما نهى
وش صار لها كانت شوي ولا تموت بس هو لاهي بجواله لكن حس بانفاس كان احد قاعد جنبه
وعلى امتداد النظر مالقى شي!!!
ولسى بيرجع عيونه عل الجوال وحس بحركه غريبه واللي هي ان نهى من طقت رجلها ورا من الخوف ولتفت وشافها وقعد مبلم<<<لفظ سعودي يعني فاتح عيونه وفمه عل الاخرومو مصدق والاستيعاب وقف عنده.
وقعد على هل حاله يمكن خمس دقايق وش هذي وشلون جت بس ماشالله حلوه بس وش جابها
وهوبين افكاره انتبه لدموعها اللي مغرقه عيونها وهو سرح بجمال عيونها الكبار وخصل من
شعرها على وجههاوبعدين من الحيا نهى غطت وجهها بيديها وحس على نفسه والتفت وهويقول
انا وش جاني ماقدشفت بنات والتفت للشباب لقاهم يسولفون بس ماشاركهم اذا ضحكو ضحك
واذا سكتو سكت وصلو للكافي وراحو تحت بالمواقف لان مثل ماتعرفون الشباب مثل النمل
القهاوي ونزلو وراحو قعدو وحمد مو معاهم ابدا كان يفكر من هاذي معقوله تكون رهف لالالا
شلون تركب مع اخوها كذا اجل مين ؟؟؟ ومن بين علامات الاستفهام تذكر انها بسياره
وتحت بمواقف الكوفي وشباب كثار وهي بلحالها
لازم يلقى حل قام يدق ويقطع على فهده عشان ترجع
تتصل ومايحسون انه يتهرب واتصلت فهده وقالت:بخيييييييييل جدا قال:طيب ابي اعطيك
ببيت عمي ابيك تفتحين الباب الكهربائي وراح خذى المفتاح من سعوود بحجه انه فهده تبي
غرض ووافق وراح للمواقف لقى شباب شوي قريبين من هناك وثارت اعصابه بس لما قرب
حس انهم مايدروون عن شي وركب سياره وشغل من دون اي كلمه وهي كانت تبكي وماستحمل
بكاها اللي شكله زاد وقال: خلاص الحين بوصلك
نهى:ــــ ـ ـ ـ ـ ـ ـ
احترم سكوتها اكيد هي مستحيه ومتفشله اما نهى:مشاعرها متضاربه خوف ورهبه وبنفس الوقت
فرح بالمغامره بس الشي الوحيد اللي هي تاكده منه ان الدموع لازمه في هذا الوضع.
وبعدين الصمت ساد وحمد ونهى متوترين ونهى ساكته وعيونها تتكلم وصلو البيت واتصلت فهده
فهده:الوهلا والله لحظه<<<وكان الجوال لسى عند اذنها
فهده:نســــــــــايــــــــــــــم وين نهى لها نص ساعه مختفيه ومطلعتني برا وانا غبيه انتظر متى
تجي
<<<حمد خلاص هذي نهى صغيرونه والله يادنيا كبرت
فهده :الو حمد ها وش تبي
حمد:وش فيك طولتي سنه ماتردين
فهده:وش اسوي بنت عمك نهى ضايعه
حمد:نهى ضايعه
هنا نهى خلاص ودها تموت عرفني ياربيه وش اسوي
حمد:طيب افتحيلي باب كهربائي معي جمس عمي
فهده:ليش وش تبي
حمد: بس بعطيك غرض
فهده:طيب وراحت وجابت ريموت وافتحت الباب حمد يفكر وش يعطيها واالله النشبه
دخل السياره ونهى لما عرفت انها دخلت تطمنت وسكتت عن الصياح ونزل
حمد: نهى اتنظري عشان اصرف فهده
نهى كان ودها تقول ماله داعي بس ماقدرت
ونزل ولقى فهده: ها وش تبي تعطيني
حمد: جيبي لي كاس مويه وعلمك
فهده:الحين جاي ومقطع شوارع عشاان كذا
حمد: روحي ولا انت الخسرانه<< واشر على جيبه فهده صدقت وراحت
فتح الباب: نهى انزلي قبل ماتجي فهده
نهى:طيب <<وهي تقول بنفسها انزل كذا من دون عبايه وش هالمصيبه وكلت امرها لله لانها
مضطره ونزلت وركضت تبي تروح
جت فهده:خذه حمد وشرب منه شي ورجعه
فهده:الحين كل ها الصيحه عشان رشفه اه يا لقهر اخلص وش تبي
حمد: انقطع سرحانه وابتلش وقالها: دقيقه وراح للسياره وخذا شريط للعبد العزيز وعطاه
اياه وقال: هذا اهدا لكم خذوه وشغلوه
فهده بكل استغراب:طيب
وطلع وشغل الراديو وطلعت اغنيه
من فينا هاليله ينام والشوق صاحي ماينام
كل من فينا حبيبي شايل بقلبه ملاااام
من فينا هاليله ينام

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــ
ودخلت فهده:هاست نهى وينك
نهى :وين يعني هنا
فهده:هين حسابك بعديين<<وتلتفت على رهف:شغلي هذا شرييط جايبه حمد يقول اسمعوه
وشغلوه البداايه كانت هدؤ مافي شي وبعدين سعود يغني مقطع من اغنيه خالد عبد اللرحمن
حبيبي اسف ازعجتك*حلو صوتك قبل ماتنام *سمعته وانشرح صدري *وكني شفتك بعيني
وبعدين بدا هو ونواف يستهبلون ضحك وازعاج والبنات ملقصرو فقعوه ضحكه عليهم
العنود:والله حراام صوته حلوبس نواف ها دعله ما يخلي احد من شرهرمخرب كلش
ندى:حرام عليك بس عشانه يغايضك تقولين كذا
وقاطعهم دخول نسايم اللي كانت سرحانه مووول وكملو البنات سوالف وضحك وهم راجعين
ام فهد: هاه وش اخبار عيال عمك
فهد: بخير بس هذا حمد قاهرني اول مجلسنا راح وبعدين رجع ولا كانه معنا
ونهى كنت ذابه اذنها ياحليله الله يجزاه خير<<طبعا هذا كله بنفسها
*************************

ووصلو كل وحده راحت لغرفتها ...

نهى مانامت تفكر بلي صار و حمد بعد

ولا واحد منهم نايم

فيه شخص ثالث يشاركهم اللي هي نسايم تبون تعرفون ليش؟

وهي بالعزيمه نادتها عمتها لطيفه وقالت لها عن مو ضوع مهم بحيياه كل بنت طبعا عرفتوه؟؟؟؟؟؟؟؟؟؟
الزواج وقالت لها انها تبها للولدها نايف اللي عنده عقده من زواج بس نسايم ماتدري عن هاشي!!!
ومافاتحت احد بالموضوع غيرها لانها ماتبي تضغط على البنت لان ابوها مستحيل يرد ولد اخته
وهي ماتبي البنت تنغصب عليه وقالتلها اذاكانت موافقه او لا هذا مستحيل يغير شي بينهم
واذا كانت تبي تردعليها تتصل عليهم.
نسايم تفكر كل شي بولدعمتها مناسب الا شي واحد ان اخوه راشد اصغر منه متزوج
وكان كل يقولها وافقي الا قلبها كان يقول ارفضي واذن فجر وهي على افكارها تعوذت من ابليس وصلت
ونامت..
&&&&&&&&&&&&&&&&&&&&&&
مر اسبوع ومافي تغيرات
وفي الجامعه:
رنا:هاه نسايم وش صار عليك؟؟
نسايم:ولا شي من تفكير عميق الى اعمق
رنا: طيب حسب كلامك ان كل شيok
نسايم: والله مادري حالتي حاله ولاقدراخذ راي احد
رنا: افا مامليت عينك طيب
نسايم:لاوالله بس تعرفين انك مثلي وانامحتاره
رنا:طيب صليتي استخاره
نسايم:ايه بس ماحسيت بشي
غاده وهي توهاجايه:وش توك اللي ماحسيتي فيه لا يكون انا خلاص روحي
انت طالق بثلاثه(وسوتننفسها بتروح)
رنا:اقول يا الدجه ارجعي واعرفي السالفه ويصير خير
غاده: لايكون بتسرقون بنك ترى انا وياكم
نسايم: ليته كان مخلصين من زمان
غاده والاهتمام واضح على على شكلها : وشو اكيد بتسرقين دوله
نسايم+رنا:هههههههههههههههههه
رنا: لا هذا فيه واحد خاطب نسايم وصار لهااسبوع ماردت
غاده: اسبببببببببببببببببببببوع كامل
الله وللحين ينتظرك
نسايم ماعرفت ترد
رنا: اقول بنات باي هذا السواق جا
وانت يا نسايم اي شي جديد خبريني
نسايم: انشاء الله باي
ـــــــــــــــــــــ
رنا هذي صديقه نسايم الروح بالروح من الابتدائي هم ويا بعض
اما غاده تعرفو عليها
بالجامعه ودخلت معاهم في الجولانها طيبه وحبوبه وتنحب
ــــــــــــــــــــــــــ
سرحت نسايم شوي وقعدت تفكر بحالتها وبعد شوي هزت راسها تبي تبعد الافكار عن راسها
والتفتت على غاده وانصدمت بشكل غاده وهي تبكي وماسكه شنطتها مثل الطفل الصغير اللي يخاف لعبته تضيع منه
نسايم: غاده اسم اللع عليك وش فيك
غاده:ــ ــ ــ ـــ (لارد)
نسايم :غاده توك وش زينك وش صار لك
غاده وهي تمسح دموعها : ولا شي بس تذكرت شي
نسايم وبعيونها نظره ترجي: ممكن اعرف وش هو
غادهـ:ـ ـ ـ ـ ـ ـ
بعد لحظات صمت قالت:
مثل ما تعرفين يا نسايم ان ابوي متوفي وانا عشت عند امي وخالي وعمي محيرني للولده اللي صايع وضايع
ومافي منه امل وانا مربوط مصيري به ولا ما اشوف بنت زيك كذا تفكراتمنى اكون مكانها موب وحده رايها مايقدم ولا يااخر واحمد ربك اذا كان اللي متقدم لك واحد اخلاقه
عاليه ومتربي صح وماعنده خرابيط هذي اليومين وسكتت ونزلت منها كم دمعه.
نسايم:معليش كل شباب كذا بس اذا جا وقت الجد يصيرون احسن الرجال
غاده: بخيبه امل مااظن
نسايم حست انها في نعمه عظيمه وشكرت باعماقها عمتها اللي مادخلت الرؤس الكباربالموضوع والا غصبوبها
نسايم: خلاص مو انتي دايم تقولين هونيها وتهون
غاده ضحكت من بين دموعها
نسايم وهي التطالع الساعه : يييووووه تاخرت يالله
غاده: على ايش
نسايم: على البنك بروح اسرقه قبل مايقفل
غاده:هههههههههههههه
نسايم: يللله مع السلامه وخلي بالك من نفسك وارمي كل شي ورا ظهرك
ـــــــــــــــــــــ
راحت ركبت السياره وهي تفكر بحال صديقتها الغاليه ودخلت من دون ماتقول اي حرف
فهد: هيييه نحن هنا
نسايم: نعم وش تبي
فهد: لا شكل الاخلاق خربانه اليوم
نسايم :اخلص والله فيني النوم
فهد: تجهزي للقنبله
نسايم بكل ملل: وشو
فهد: بنجيب نهى
نسايم: لالالا خلاص انا بنوم العصر
بالسياره معروف عن نهى انها اذاكانت بترجع معها فهده تتاخر عليهم لانهم بيسكتون وينطمون
فهد: اليوم ثلثاء وبتجي فهده وتكمل المصخره
نسايم: الله يعيني على الأنتظار
ــــــــــــــــــــــــــ،،،
وصلو للمدرسه ونادو الين ملو بس للاسف لاحياه لمن تنادي
وطفش وحر وظهر زحمه يعني كل واحد موصل حده
جت نهى ومعها فهده: انتو للحين هنا
فهد: لا هناك اركبي لااخلي هالنعله تحوس بوجهك
وركبوفهده: سلام عليكم
فهد+نسايم: وعليكم السلام
وصلو البيت وكلهم تعبانين ماعدا فهده ونهى وطيران رقو للغرفه
ندى لا ن دوامها يبدى الساعه
سبع ويخلص عشرودخلو الغرفه ندددددددددددددددددددددددددددددددددددىىىىىىىىى(qq16 3)
قومي وجع وقامويحوسون بلغرفه حاسو اغراضها ازعجو
في نهايه نهى عطت فهده نظره خبيثه
وضحكوراحو للمسجل وطولو على اخر شي وبعدين حطت كست نوال زغبي وقوم
البيت كله وندىالمسكينه من الحمق قامت تطقهم ودخلو في معركه كبيييره
ودخل فهد عليهم: وهوناسيان فهده موجوده
وفقعها ضحكه وطلع
لان اصلا اشكالهم مب باينه كلهم عالسريرويطاقون فهو المسكين لمادخل ماشاف الاكشش ومصارخ
ونزل تحت لحمد لانه عازمه على الغدا
حمد بقلق مصطنع : هاه وش صار
فهد: ابدا ولا شي قامت الحرب بين السعلوتين نهى وفهده نهى على خنفساء ندى
حمد لما سمع طاري نهى فز قلبه قال يمكن الحين طقوها مسكينه راحمها
من جد<< مايدري انها كفختهم
ابو فهد: والله مسيكينه هاالندى ماتستانس بها اليوم الخفيف الا ونهى مخربته
فهد: لا واللعانه انه مهي وفهده من النجاسه ماخلو جيتهم الاربعاء لا ثلاثاء بس يزعجونها
حمد: فهد رح فكهم حراام
فهد: نعم ....... الضاهر انك مستغي عني
حمد وهو مستغرب: ليش
فهد: مره دخلت ونهى وندى يتطاقون ورحت بفكهم مسوي كبير اسدحوني وقعدو يتطاقون فوقي والله لو زوليه رحموها اكثر
حمد وهي طايره عيونه : وانا قول فهده من وين جايبه حركات طقاق
ابو فهد: يالله تعالو نتغدى
فهد: حيااك
ودخلويتغدون ووصلت نسايم من الجامعه وهي تقريبا اخذت قرارها
ودخلت سلمت وصعدت فووق وقالت انها بتدق على عمتها اذاصحت
ـــــــــــــــــــــــــ
نهى وفهده: جالسين يلعبون بليستيشن وماخذين الراحه
دخل ابو فهد: هاه بناتي شخباركم
فهده: طيبه
ابو فهد : دووم انشالله
فهده+نهى :اامين بوجودك
قال عند لكم خبر انشالله يعجبكم
فهده ونهى قربو من تشويق
ابوفهد: تبون تعرفون
نهى : يبه هذي يبي لها سؤال
ابوفهد:بعداسبوعين خالكم سعد بيسوووي عزيمه بمزرعته وانتو اول الحاضرين
نهى+فهده: التفتو على بعض ومره وحده ضحكو من الوناسه
نهى: يبه لازم نروح للسوق
ابو فهد: انشالله
فهده: خلاص نهى بكره نرجع مع بعض من المدرسه نبدل وبعدين نطلع نتغدىونتشرى
نهى: هاه يبه وش رايك
ابوفهد: احلفي بس من بيررروح وياكم
نهى : ناخذ فهد وفهده كملت : وحمد
ابو فهد: خلااااااص
ــــــــــــــــــ
ومراليوم عادي و راحو للمدرسه وهم طالعين كانو راكبين مع السواق وصلو للبيت وكان فهد توه واصل
وكان لابس نظارات شمسيه ويوم شافهم نزل النظاره
فهد: احلفو انتو بس
فهده+نهى: اييييش
فهد :تقررون تاخذوني وتودوني وتجيبوني وانااخرمن يعلم
نهى: الله يقطع ابليسك موقفنا بالشمس عشان تقول كذا احسب عندك سالفه ودخلت وسفهته
امافهده قالت:فهد خلك فري وتعال معنا عاد انا عازمتك على حسابي
فهد: اقول ادخلي ناقصين مجنن يصيعون مع عيال عمهم
دخلت وهي تضحك
وفهد ما ستغرب من ميانتها لانها متربيه معاه وكل شي بينهم عادي وهي بالعربي الفصيح ما تستحي منه
وراحو بدلو وكان حمد وفهد متفقين يسوون مقلب بل مهابيل دخلت فهده وقالت
فهده:ماي برذر ار يو هير؟؟
حمد:نو اي ام ان قوطي ببسي
فهد فقعها ضضضضضضضضضضضحكه : شا هل الانجليزي المكسر
نهى وهي داخله: وت ايز سالفه
حمد: هاه الله وعلم من اللي انجليزيته مكسره ونهى ماتت حيامنه
فهده :يالله يالحبيب حم السياره ورانا مشاوير
حمد: اقول تقلعي سواق ابوكمانيب رايح لشيء
فهده: مب لازم يالله فهد مشينا
فهد: لاكون اخوك ضايع وانامادري ولازوجك يوم جالسه تطرين قالها بطنازه رفعت ضغط نهى
نهى: اصصص بتودوناولابطقاق هي مذله
فهد+حمد:لالالالالالالااااااااا قالوها بطريقه تستفز
قامت نهى وقالت: مع السلامه
وفهده راحت وراها: بااااااااي شباب
وفهد وحمد: ضحكووووووو لان خطتهم انجحت
وثواني ورجعو البنات ومعهم ندى : تششششااااااااوياحلوين
وحمد: لا على وين
ندى قبل ماتدخل ماخذت جلال لبست عبايتها من جوا
ندى:بنروح للسوق وهي تكلم نهى: قلتي للسواق يشغل سياره
فهد: لا من سمحلكم
ندى: انت عليت بهم ماودك توديهم فانا رحمتهم وقلت للامي وافقت نروح لانناصبح
فهد+ حمد:لااجل بنروح معكم<<< خربت الخطه هم كانومئملين بترجي وشي من هذا
ندى: منب رايحين وانتم معنا يله باي وطلعو وماخلولهم مجال اما حمد تحسف لانه طاوع فهد
ولانه ضيع فرصه يملي عينه من عيون نهى بس للاسف ماقدر
وجلسوشوي يسولفون وتغدى حمد بعدين طلع منهم راح لصديق عمره يوسف وقاله كل اللي صار
يوسف:تستاهل من قالك تبيزر
حمد:حرام عليك ياشيخ لا تزيد همي الله يعافيك
يسف: الله والهم لو انك خسران حلالك كان قلنا
حمد: اقول باي بروح انا
يوسف: فمان الله ولا تنسى تحلم فيها
حمد: اقول ورىما تسكت
وراح ولاعبره ويوسف يضحك
ــــــــــــــــــ
كانت ماسكه التلفون ويدها ترتجف وحالتها حاله ودقت الرقم
المتصل: الو
نايف: الو
المتصل:السلام عليكم
نايف : وعليكم السلام
المتصل: ممكن اكلم ----------
ــــــــــــــــــــــــــــــ
تتوقعون من المتصل ووايش يبي؟
وش بيصير على نهى وفهده بالسوق؟
وحمد وشلون بيلقى حل يعوض خسارته بشوفه حبيبته؟
ونسايم: وش بتكون اخر تطورات على خطبتها؟
كل هذابنعرفه بالجزء الجاي

&&&&&&&&&&&&&&&&&&&&&&&&&&&&&&&&&&

» لحظـــة حـب / رواية كامله
» من أجمل الأدعيه
» تواقيع شهر رمضان 2010 أجمل احلى تواقيع رمضانيه